Intervju med Jens Brekke - Strilatun 27.02.2025

Bilete: Jens Brekke

Tek vare på forteljarkunsten

Jens Brekke er oppteken av den levande forteljarkunsten. Den han kan hugsa frå oppveksten sin, då folk besøkte kvarandre og underhaldt kvarandre, mellom anna med forteljingar.

I Strilatun torsdag i vinterferien serverte han muntre døme på denne forteljarkunsten, og desse forteljingane, han i ein mannsalder har gjort alt han kan for å bevara for ettertida. Dei frammøtte svarte med jubel og gapskratt.

- Nordhordlendingane er flotte kulturkonsumentar, seier Brekke.

Og, ja, han veit kva han snakkar om, for vikjaren har vore her før, mellom anna i samband med Knarvikmila og Knarvikkonferansen. Bindeleddet har sjølvsagt vore ein annan profilert vikjar, Helge Brekke.

Dei to har samhandla ved fleire høve og har hatt mykje med kvarandre å gjera opp gjennom åra. Mellom anna i idretten.

Men Brekke har mange fleire han samhandlar med. Visesongaren Ola Bremnes er ein av dei. I snart eit kvart hundreår har han gjeve ut eit hefte han kallar for Illustrert Tyleskap. Her samlar han forteljingar frå sitt eige lokalmiljø, men også frå nærliggjande bygder. Ikkje minst er han glad i gamle vossastubbar. Teikningane i dette heftet er det Ola Bremnes som har laga.

- Gjennom åra er det vel blitt rundt 300 teikningar, fortel Brekke.

Den tidlegare skulelæraren har brukt dei siste rundt 20 åra på ulike kulturaktivitetar. Mellom anna har han skipa eit Per Sivle-lag som gav seg sjølv til oppgåve å syta for at Sivle sin forfattarskap kom fram att i lyset, etter at han meir eller mindre vart borte frå bokheimen.

- Det klarte vi. Sivle har fått sin fortente plass i litteraturhistoria, seier Jens Brekke.

Tekst: Knut Langeland.